Retrospetiva dles reuniuns deboriada passades
Pröma sentada deboriada di cater consëis legislatifs a Maran
(21 de mà dl 1991) |
La pröma sentada deboriada di consëis legislatifs dla Provinzia autonoma de Balsan, dla Provinzia autonoma de Trënt, dl Tirol y dl Vorarlberg, che é gnüda programada dal Consëi dla Provinzia autonoma de Balsan ai 5 de jügn dl 1990, é gnüda tignida ai 21 de mà dl 1991, cun a ce la presidënta dl Consëi provinzial südtirolesc da inlaôta, Rosa Franzelin Werth, y dai presidënc dl consëi legislatif dl Tirol da inlaôta, Carl Reissigl, dl consëi legislatif dl Vorarlberg, Bertram Jäger, y dl Consëi provinzial de Trënt, Pierluigi Angeli.
Al ordinn dl dé dla pröma sentada deboriada "a cater" êl l'aprovaziun de döes ressoluziuns, öna por renforzè la colaboraziun sura i confins fora dles cater provinzies interessades y öna revardënta le conesciü "Accordino", chël ô dì la regolamentaziun preodüda dal'acordanza Degasperi-Gruber por ci che reverda i barac comerziai alisirà danter i lonc dl Tirol y dl Vorarlberg y la regiun Trentin-Südtirol. Les desposiziuns plü importantes da n punt de odüda politich ê chëres por renforzè la colaboraziun sura i confins fora danter les cater provinzies. Tla relaziun ajuntada él implü ciamò da lì che la tradiziun lungia de aministraziun autonoma democratica di cater mëmbri rapresentëia na richëza y n ideal che ne n'é nia madër da mantignì mo cinamai da laurè fora. Ponsun madër ala conviënza pazifica danter i grups etnics, ala colaboraziun y al aiüt, al'autonomia regionala y al respet dl singul. Sce al ess da saltè fora desfarënzies danter les singoles provinzies ne dess chëstes nia ester ram de vera mo plütosc deventè n arichimënt por vignun, ince acioche ara vais da se svilupé tres plü inant tl ciamp dla cultura, dla economia y dla sozieté. Südtirol, le Trentin, le Tirol y le Vorarlberg se tol dant porchël de fà pié ia scomenciadies por valorisé les ressurses soziales, economiches, culturales y politiches, insciö da deventè n model por la Europa unida dl dagnì, te chëra che la dimenjiun regionala messess gnì valorisada deplü.
Cun le jì en forza dla ressoluziun, metüda jö te 9 punc y che contëgn les detlaraziuns d'intenziun, dantadöt generales mo en pert ince concretes por ci che reverda na maiù colaboraziun danter les cater provinzies, ti vëgnel surandè ai cater presidënc di consëis legislatifs danter l'ater le dovëi "de ti jì do ales intenziuns detlarades chilò y de mëte sö na comisciun interregionala che dess rapresentè vigni consëi legislatif por arjigné ca les sentades deboriada dles cater indunades legislatives, che gnarà tignides almanco n iade vigni dui agn. La comisciun mëss respidlé la composiziun di consëis legislatifs." La ressoluziun vëgn aprovada cun 3 usc contrares, 5 astenjiuns y les atres usc a öna.
Secunda sentada deboriada di cater consëis legislatifs a Desproch
(2 de jügn dl 1993) |
La secunda sentada deboriada di consëis legislatifs dla Provinzia autonoma de Balsan, dla Provinzia autonoma de Trënt, dl Tirol y dl Vorarlberg vëgn tignida ai 2 de jügn dl 1993 a Desproch, chël ô dì 2 agn do la pröma sentada da Maran, porvia che ara ti tocâ - aladô dla rotaziun fata fora - al consëi legislatif dl Tirol da organisé la proscima incuntada.
Al ordinn dl dé de chësta secunda sentada deboriada "a cater" él l'aprovaziun di regolamënc por la comisciun interregionala y por la sentada deboriada di cater consëis legislatifs (1° punt al ordinn dl dé), la ejaminaziun de na proposta de moziun sön la colaboraziun interregionala sura i confins fora danter les corporaziuns teritoriales (2° punt), la ejaminaziun de propostes de moziun desvalies, vignöna metüda adöm da n gröm de injuntes, revardëntes la colaboraziun sura i confins fora danter les provinzies che fej pert dl "Accordino" ti ciamps dla sciënza, dla inrescida, dla scora, dla cultura, dl sport y dla informaziun (3° punt), la economia y i trasporc (4° punt) sciöche ince l'agricoltöra, la urbanistica y le turism (5° punt).
Aladô dla deliberaziun adorada dala comisciun interregionala le dé dan la sentada deboriada, vëgnel spostè l'aprovaziun dl ordinn dl dé, porvia che le presidënt dl consëi legislatif dl Vorarlberg, Bertram Jäger, manifestëia al scomenciamënt dla sentada le dejidêr de podëi laurè adöm te na maniera plü limitada y porchël te na forma plü strënta, portan dant sciöche motivaziun le fat che an é tl laûr de mëte sö, dlungia la regiun europeica dl Tirol ince na regiun europeica dl Lêch de Costanza, y che le Vorarlberg se sënt - por rajuns storiches, culturales y geografiches - plü dlungia a chësta ultima, cun chëra che al oress mëte man na colaboraziun plü concreta. Porimpò ne stlüj chësc interès tler por la regiun europeica dl Lêch de Costanza nia fora na colaboraziun dl Vorarlberg tla sentada deboriada di cater consëis legislatifs, tan inant che ara se trata de na colaboraziun menüda, cernüda, chël ô dì limitada ai ciamps che reverda diretamënter le Vorarlberg. Le presidënt Jäger injunta che chësc se damana por forza che al ti vëgnes chirì na lerch nöia, chël ô dì che an mëss se studié jö danü le rode dl Vorarlberg tla sentada deboriada, chësc ince tl interès di atri trëi mëmbri, porvia che le Vorarlberg ne n'ô te degun caje arferè o tignì sö i atri trëi consëis y restrënje insciö so ciamp de laûr.
Al vëgn deperpo aprovè cun dër na gran maioranza les propostes de moziun dades dant ti punc 2, 3, 4 y 5 al ordinn dl dé, revardëntes scomenciadies che va sura i confins fora, sciöche la realisaziun de n coliamënt radio sot a forma de cërtl danter Balsan-Desproch-Balsan, sciöche ince n barat de programs radiotelevisifs tl lingaz original, le barat de studënc y insegnanc, la istituziun de na comisciun de düc por la organisaziun de manifestaziuns sportives metüdes a jì deboriada, scomenciadies por ci che reverda la promoziun agricola y la comerzialisaziun di produc di paurs da munt, sciöche ince le trasferimënt dl trafich dala strada sön la ferata.
Terza sentada deboriada di trëi consëis legislatifs a Riva del Garda
(31 de mà dl 1996) |
La terza sentada deboriada vëgn metüda a jì dal Consëi dla Provinzia autonoma de Trënt ai 31 de mà dl 1996 a Riva del Garda. Ara se trata dla pröma dërta sentada deboriada "a trëi", porvia che le consëi legislatif dl Vorarlberg à surantut le status de osservadù che al s'â damanè do la sentada deboriada di cater consëis legislatifs da Desproch y che ti ê gnü conzedü zënza resserves dales atres trëi provinzies. Chësta sentada é atramënter, ince porvia che ara vëgn tignida do che l'Austria é gnüda tuta sö tla Uniun Europeica, chël ô dì do le 1° de jenà dl 1995, y porchël él le pröm iade che dötes les provinzies fej pert di stac mëmbri dla Uniun. Al ordinn dl dé metü dant dala comisciun interregionala, formada sciöche bele en gaujiun dla sentada da Desproch, dai trëi presidënc y da 6 aconsiadus de vigni consëi legislatif, él indöt 21 propostes de moziun, portades dant dai aconsiadus y dai mëmbri di esecutifs, sciöche ince döes propostes de deliberaziun che reverda la sussidiarieté, tratades dala comisciun interregionala le dé dan la sentada deboriada y metüdes ite tl ordinn dl dé cun la prozedöra d'urgënza.
Dles 23 propostes presentades nen él 3 che reverda la formaziun y la cultura, 4 le svilup economich y la ocupaziun, 4 la sconanza dl ambiënt y dl raiun alpin, 3 i trasporc y les atres 8 la campagna cuntra la droga, la compartezipaziun dles döes provinzies y dl Tirol ala esposiziun mondiala EXPO de Hannover, la proteziun zivila, le slariamënt de na cultura de pêsc y de conviënza, la informaziun dla opiniun publica sön l'ativité di trëi consëis legislatifs y sön les scomenciadies portades inant deboriada, sciöche ince les aspetatives revardëntes la conferënza dl govern dla Uniun Europeica tignida a Turin dl 1996.
La sentada deboriada di trëi consëis legislatifs aprovëia dötes les 23 propostes, 20 de chëstes al'unanimité.
Cuarta sentada deboriada di trëi consëis legislatifs a Maran
(19 de mà dl 1998) |
Dl 1998 i tóchera indô a nosc Consëi provinzial da organisé la sentada deboriada di trëi consëis legislatifs, preodüda por i 19 de mà tl Kursaal da Maran.
Ince chësta ota vëgn les propostes, presentades aladô dl terminn dai aconsiadus y dai mëmbri di esecutifs, ejaminades damperfora dala comisciun interregionala y metüdes ite porchël tl ordinn dl dé dla sentada deboriada. Finalmënter röiel ince al ordinn dl dé les propostes de deliberaziun liades al regolamënt dla comisciun interregionala y a chël dla sentada deboriada, sotescrites dai presidënc di trëi consëis legislatifs Montefiori (Südtirol), Mader (Tirol) y Giordani (Trënt). Les verjiuns definitives dl sböz dl regolamënt é pö gnüdes aprovades tramesdöes al'unanimité sön la basa de discusciuns menüdes fates dala comisciun interregionala tles sentades di 21 d'otober dl 1997 y di 16 d'aurì dl 1998, do che an â aratè che al jiss debojëgn da ti ciarè jö ciamò n iade, cossa che ê bele gnüda metüda al ordinn dl dé dla sentada deboriada di trëi consëis legislatifs da Desproch (2 de jügn dl 1993), mo che ê gnüda sburlada al ultim momënt - da öna na pert ajache le Vorarlberg â manifestè en la vëia de chësta sentada deboriada le dejidêr de se studié jö ciamò n iade la forma de süa colaboraziun tl ram dla sentada "a cater" y dal'atra ajache n valgügn mëmbri dla comisciun instëssa â damanè en la vëia dla sentada deboriada di 31 de mà dl 1996 a Riva del Garda che le sböz dl regolamënt, porater bele adatè al nü status da osservadù dl Vorarlberg, gniss controlè ciamò n iade a na maniera che an podess ti dè de plü dërc ales mendranzes politiches.
Al ordinn dl dé dla sentada deboriada êl, a pert les propostes de regolamënt dër nominades y che é spo gnüdes aprovades cun dër na gran maioranza, ince na proposta de moziun sotescrita dal presidënt dla Provinzia de Trënt Carlo Andreotti, dal presidënt dl consëi legislatif dl Tirol Helmut Mader y dal presidënt dl esecutif dl Tirol Wendelin Weingartner, revardënta l'aprovaziun de na acordanza por la colaboraziun sura i confins fora tl ciamp de na regiun europeica danter la Provinzia autonoma de Balsan, la Provinzia autonoma de Trënt y Tirol, sciöche ince 17 propostes de moziun portades dant dai aconsiadus y dai mëmbri di esecutifs y azetades dala comisciun interregionala. I argomënc tratà va dai ciamps sciöche l'ambiënt, le trafich, la proteziun zivila, la economia, l'agricoltöra, la forza eletrica al ciamp dla scora y dla cultura cina ala formaziun profescionala y ala politica ocupazionala, ala sanité, ales ativitês sportives dles porsones cun andicap y ai jogn. Dötes chëstes propostes de moziun vëgn aprovades dala sentada deboriada di trëi consëis legislatifs. La proposta de moziun plü zitia é chëra che reverda l'acordanza por la colaboraziun sura i confins fora tl cheder de na regiun europeica danter Südtirol, le Trentin y le Tirol, che vëgn aprovada do che al é gnü portè dant n valgönes mudaziuns y dër tröc intervënc, cun 9 usc contrares.
Cuinta sentada deboriada di trëi consëis legislatifs a Desproch
(24 de mà dl 2000) |
Dl 2000 i spétel indô al consëi legislatif da Desproch da organisé la cuinta sentada deboriada di trëi consëis legislatifs; al é belavisa passè 2 agn dal'ultima sentada dl 1998 te Südtirol. Chësta ota s'incunta i trëi consëis ai 24 de mà dl 2000 tl zënter di congresc da Desproch.
Sciöche al é preodü dal regolamënt, vëgnel tignì dan la sentada deboriada na sentada dla comisciun interregionala por ejaminé les propostes de moziun portades dant dai aconsiadus y dai mëmbri di esecutifs y por scrì sö chëres che vëgn aratades da podëi gnì metüdes al ordinn dl dé. Al passa 26 propostes che reverda l'Europa (3), i trasporc y l'ambiënt (7), le sozial, la sanité y la segurëza (5), la istruziun y la cultura (7), la economia y l'agricoltöra (4).
Dötes les propostes vëgn aprovades dala sentada deboriada y dedô dades inant, sciöche preodü dal regolamënt, dai trëi presidënc di consëis legislatifs ai esecutifs por la metüda en forza, sciöche ince dal presidënt en ciaria, chël ô dì le presidënt dl consëi legislatif dl Tirol, al presidënt dl consëi legislatif dl Vorarlberg acioche chësc informëies so esecutif.
Sesta sentada deboriada di trëi consëis legislatifs a Riva del Garda
(29 de mà dl 2002) |
La secunda roda de sentades vëgn stlüta jö dala incuntada de Riva del Garda, olache al vëgn tignì ai 29 de mà dl 2002 la sesta sentada deboriada di trëi consëis legislatifs, metüda a jì por le secundo iade dal Consëi dla Provinzia autonoma de Trënt.
Les propostes de moziun lasciades pro por gnì tratades dala comisciun interregionala che s'â incuntè ai 3 d'aurì dl 2002 é 28, de chëstes nen él 6 che reverda "l'Europa, les relaziuns sura i confins fora y les mendranzes", 7 "l'ambiënt, i raiuns da munt y l'agricoltöra", 3 "les comunicaziuns y i trasporc", 6 "la economia, la ocupaziun y le turism" y laprò ciamò 6 "la cultura, la istruziun y le sozial".
De chëstes 28 propostes de moziun nen vëgnel indere ma tratè 6 indortöra, deperpo che chëres che reverda le secundo grup, chël ô dì "l'ambiënt, i raiuns da munt y l'agricoltöra" ne va nia sura la discusciun fora. Dötes les atres ne vëgn gnanca tratades, porvia che la sentada vëgn stlüta jö massa adora.
Ci él pa sozedü? Deperpo che al gnô tratè la proposta de moziun n. 6 "Conzesciun, por rajuns de carater umanitar, dla grazia ales porsones condanades porvia di atentac di agn '60 te Südtirol", portada dant dai aconsiadus Klotz y Pöder y lasciada pro dala comisciun interregionala ala trataziun tla sentada deboriada cun n valgönes mudaziuns, adora la maioranza di aconsiadus dl Consëi dla Provinzia autonoma de Trënt por le pröm iade la poscibilité, preodüda dal regolamënt, de lité vigni consëi legislatif despartì, cun le resultat che la proposta de moziun vëgn - tres chësta litaziun despartida - refodada a maioranza. Aladô dl regolamënt mëss la proposta porchël gnì aratada refodada dala sentada deboriada zënza che le Consëi dla Provinzia autonoma de Balsan o le consëi legislatif dl Tirol pois dì fora süa minunga sön chësc.
Chësc resultat dla lîta nia aspetè (por le pröm iade à la sentada deboriada refodè na proposta che la comisciun interregionala â lascè pro por gnì tratada y dantadöt na proposta sön n argomënt tan borjënt y zite sciöche chël dla conzesciun dla grazia ai conesciüs ativisc südtirolesc) pësa dassënn sön le decurs di laûrs. Atira do la protlamaziun dl resultat dla lîta arbandonëia i presentadus dla proposta de moziun, i aconsiadus Klotz y Pöder, sciöche ince l'aconsiadù Leitner, le salf por protesta, ince n valgügn aconsiadus dla SVP va fora por se sentè adöm y tó na dezijiun de co jì inant. Intratan van inant te salf cina misdé cun la ejaminaziun dles propostes de moziun sön l'argomënt "ambiënt, raiun da munt y agricoltöra".
Domisdé, canche al vëgn indô davert la sentada sozédera: le mënagrup dla SVP Walter Baumgartner damana che la sentada vëgnes atira sospenüda, porvia che le resultat dla lîta sön la proposta de moziun n. 6 rapresentëia na ofenüda por la popolaziun de Südtirol y al va porchël debojëgn da tlarì sce al é bëgn ciamò dan man les fondamëntes por na bona colaboraziun. L'aconsiadù fej la proposta de cherdè ite danü la sentada deboriada di trëi consëis legislatifs tl tëmp de n ann por ejaminé i atri punc al ordinn dl dé sciöche ince por tratè danü, y chësc iade aprovè, la proposta de moziun n. 6.
Do la domanda dl aconsiadù Baumgartner, na ligna de intervënc en cunt de chësc y na picia incuntada danter i presidënc di consëis legislatifs, mët le presidënt en ciaria Cristofolini tla finada a litaziun la domanda sce jì ciamò inant cun i laûrs. Le resultat de chësta lîta, fata por vigni singul consëi legislatif despartì - sciöche al ê gnü damanè dal aconsiadù Baumgartner, é chël che al vëgn refodè cun dër n gran numer de usc contrares (ma 3 usc a bëgn) da pert dl Consëi dla Provinzia autonoma de Balsan da jì inant cun la sentada, chël ô dì cun i laûrs dla sentada deboriada. I laûrs vëgn porchël stlüc jö massa adora cun la comunicaziun che la comisciun interregionala po gnì cherdada ite da d'altonn por valuté le sozedü y tó la dezijiun de co jì inant.
Do avëi damanè les forzes politiches rapresentades te sü consëis, tol indere i trëi presidënc di consëis legislatifs la dezijiun de ne pié a man degöna scomenciadia por jì inant cun i laûrs dla sentada deboriada tratan la legislatöra, che é tl laûr da jì a piz sides te Tirol co tla regiun Trentin-Südtirol (setëmber 2003 tl Tirol y novëmber 2003 te Südtirol y tl Trentin), mo de cherdè ite plütosc na nöia sentada deboriada di trëi consëis legislatifs (cun de nöies propostes de moziun) tla legislatöra nöia y de ti surandè la organisaziun - aladô dla rotaziun fata fora - al Consëi dla Provinzia autonoma de Balsan. Chësta nöia sentada deboriada é gnüda fissada por le 22 de forà 2005 a Maran.
Setima sentada deboriada di trëi consëis legislatifs a Maran
(22 de forà 2005) |
Aladô dla rotaziun fata fora, do la sesta sentada deboriada di 29 de mà 2002 a Riva del Garda, ara tochè al Consëi dla Provinzia autonoma de Balsan da mëte a jì la terza roda dla sentada deboriada preodüda vigni dui agn.
Chësta sentada (la setima endöt) é gnüda tignida, sciöche ince les döes da denant, te Südtirol, tl Kursaal a Meran, ai 22 de forà 2005.
Sciöche preodü dal regolamënt intern, él gnü tignì ai 20 de jenè 2005 dan la sentada deboriada na indunada dla comisciun interregionala, olach'an à ejaminé les propostes de moziun presentades incina ai 3 de dezëmber 2004 dai aconsiadus/dales aconsiadësses y dai mëmbri di esecutifs dles trëi regiuns. Söla basa di resultac de chësta ejaminaziun él gnü spo metü sö l'ordinn dl dé dla sentada deboriada.
A pert na proposta de mudaziun dl regolamënt intern dla sentada deboriada, presentada dai presidënc di trëi Consëis legislatifs, él gnü metü tl ordinn dl dé 23 propostes de moziun sura materies sciöche l'Europa, la colaboraziun sura i confins fora y les chestiuns istituzionales (3), l'economia, l'agricoltöra, i raiuns de munt y le svilup rural (6), la sanité y i sorvisc soziai (2).
Dötes les propostes é gnüdes aprovades dala sentada deboriada, 17 de chëstes al'unanimité. Dai resultac dla litaziun (12 usc de cuntra) pon odëi che l'introduziun de n sëgn de marca unifiché por le svilup dl turism tl Trentino-Südtirol y Tirol, é stada la proposta plö contestada.
Ince la proposta sura "Trafich - clasificaziun de Südtirol, Trentino y Tirol sciöche raiun sensibl" à porté a discusciuns tres plö lunges y a val' usc contrara; nia düc i aconsiadus/dötes les aconsiadësses é sta a öna cun l'invit contegnü tla proposta de "detlarè prioritar le proiet dl tunel dl Brenner cun sües trasses de azès y de mëter a disposiziun i mesi finanziars por la realisaziun dl proiet" y gnanca cun l'invit ai esecutifs di trëi Länder de "portè inant cun prescia le proiet dl tunel dl Brenner y de sües trasses de azès", sciöche desmostra la votaziun por perts separades, olache cinch aconsiadus/aconsiadësses à lité cuntra i invic suramenzionà.
Sciöche preodü dal regolamënt, i presidënc di trëi consëis legislatifs à dè inant a sü esecutifs dötes les moziuns aprovades dala sentada deboriada; le presidënt en ciaria, chël ô dì la presidënta dl Consëi dla Provinzia autonoma de Balsan, les à dades inant ince al presidënt dl Consëi legislatif dl Voralberg acioche chësc informëies so esecutif.
Do ch'al é passè n ann dal'ultima sentada deboriada darà i presidënc dla Provinzia autonoma de Balsan, dl Tirol y dla Provinzia autonoma de Trent inant al presidënt en ciaria, chël ô dì le presidënt dl Consëi legislatif dl Tirol, na pröma relaziun scrita sura l'atuaziun dles moziuns aprovades ai 22 de forà 2005 a Maran, dal momënt che la proscima sentada deboriada gnarà tignida tl Tirol, bunamënter ai 19 de aurì 2007 a Desproch. Na secunda relaziun gnarà spo menada al plö tert 60 dis denanche al mëtes man la proscima sentada deboriada di trëi Consëis legislatifs.
Otava sentada deboriada di trëi consëis legislatifs a Desproch
(18 de aurì 2007) |
L'otava sentada deboriada di trëi consëis legislatifs, organisada dal consëi legislatif dl Tirol sot la presidënza dl prof. ing. Helmut Mader, é gnüda tignida ai 18 de aurì 2007 a Desproch.
Dan da chësta sentada s'â abiné ai 1° de merz 2007 la Comisciun interregionala componüda da set rapresentanc/rapresentantes di singui consëis, che à ejaminé aladô dl regolamënt intern les 27 propostes de moziun presentades dai aconsiadus/dales aconsiadësses dan dai 15 de jené 2007 por odëi sce ares podô gnì tratates tla sentada deboriada. Söla basa di resultac de chësta ejaminaziun él gnü spo metü sö l'ordinn dl dé dla sentada deboriada.
Dles 27 propostes de moziun prejentades n'él gnü azeté 24 ch'é spo gnüdes metüdes sö l'ordinn dl dé dla sentada deboriada. Öna na proposta de moziun é gnüda trata zoruch dai presentadus y döes é gnüdes refodades dala comisciun. Por garantì n miù andamënt di laûrs y sura döt na discusciun plö trasparënta sura les propostes, ân reunì les 24 propostes de moziun metüdes al ordinn dl dé dla sentada deboriada te materies desvalies, ch'al ô dí ti tems suandënc: economia, agricoltöra y politica forestala, i raiuns de munt y le svilup rural (4 propostes) scora, cultura y jonëza (8 propostes), trafich y sconanza dl'ambiënt (6 propostes) y sanité, sorvisc soziai y segurëza (6 propostes).
Dötes les propostes é spo gnüdes aprovades dai trëi Consëis legislatifs tla sentada tignida ai 18 de aurì 2007 y de chëstes é bëgn 23 gnüdes aprovades al'unanimité. Ma la proposta che reverdâ na majera colaboraziun interregionala y na posiziun unitara por ruvé a na dezijiun de prinzip sura la realisaziun dl tunel dl Brenner é gnüda aprovada a maioranza (cun 8 usc contrares).
Sciöche preodü dal regolamënt intern dla sentada deboriada presentarà i presidënc dla Provinzia autonoma de Balsan, dl Tirol y dla Provinzia autonoma de Trënt, do da n ann dal'ultima sentada, por meso dl presidënt en ciaria (chël ô dí dl presidënt dla Provinzia autonoma de Trënt, dal momënt che la proscima sentada deboriada gnarà tignida tla Provinzia de Trënt tl secundo semester dl 2009) na pröma relaziun sura la realisaziun da pert di singui governs dles propostes de moziun aprovades tla sentada deboriada. Na secunda relaziun gnarà presentada al plö tert 60 dis dan dala proscima sentada deboriada di trëi Consëis legislativs.
|
e-mail
Italiano
