Schuler, Arnold (SVP)

Arnold Schuler ie nasciù a Maran ai 19 d'agost dl 1962 y sta a Plaus. L ie maridà cun Maria Alma Clara y à trëi mutons: Hannes de 24 ani, studënt de economia agraria y fitomedejina tla BOKU de Viena, Stephanie de 22 ani, studënta de proietazion dla cuntreda tla medema università, y Claudia de 19 ani, che fej tosc l'ejam de maduranza, sportiva, campiunëssa taliana y vizecampiunëssa dl mond de handbike (sport per persones handicap), sportiva jëuna dl ann 2007 de Südtirol.
Schuler à fat la scola agrera y ie paur sun l Reasler-Hof. L ie atif te lies defrëntes, presidënt fundadëur di paures jëuni de Plaus, 15 ani ala longia iel stat secreter di studafuech ulenteres, de chëi che l ie nce cumëmber, y per 5 ani iel stat tl diretif dla lia dl sport de Plaus. Do vester stat trëi ani cunselier de chemun, dal 1985 al 2009 ambolt de Plaus; Dal 2005 iel tla jonta dl cumprensore dl Burggrafenamt. Dl 2008 iel unì lità cun 17.222 ujes tl Cunsëi provinziel.
Tëmp liede: pervia che la politica tol ite gran pert de si tëmp, stal, canche l à dl'aurela, gën a cësa cun si familia, l se tripa danter i lëns da frut, iló paussel y ie bon de se regeneré. L sport ie de gran mpurtanza te si vita. L ne va nia mé nstës gën cun la roda, ma l acumpaniea nce gën si muta Claudia canche la se alenea. Te si fins dl'ena liedesc se cruziel dla grupa di sportifs cun handicap fisich ti stajan daujin pra si garejedes.