Repetto, Barbara (Partito Democratico - Demokratische Partei)

Barbara repetto ie nasciuda a Bulsan dl 1947, la à gën la leteratura, l'ert, la mujiga, l'armunia. La à fat la scoles elementeres y mesanes pra l Istitut "Marcelline" a Bulsan, dadedò studi tlassics tl lizeum Carducci y pra l'Università de Bologna, ulache la à stlut ju cun na spezialisazion de storia dl'ert. Tesa de laurea sun l autere de Michael Pacher dla vedla dlieja de pluania de Gries cun l prufessëur Arcangeli. La à nsenià per n valgun ani talian tla scola mesana de Neumarkt, tudësch ti cursc da sëira de scola mesana y talian y storia tl Istitut Tecnich Cumerziel de Bulsan.
Dadedò scumëncela a lauré tl'aministrazion provinziela vencian l cuncors de ispetëura aministrativa tl ciamp dla cultura. Ti prim ani se cruziela de scola y cultura, plu tert de furmazion prufescionela. Pervia che chësc ie n ciamp nuef per ëila se scrijela ite tla facultà de soziologia, fajan duc i ejams y se dajan ju dantaldut cun soziologia dla urganisazion dl lëur.
Dl 1986 devëntela diretëura dl Ufize per la Cuestions europeiches. Tlo àla da nfé dantaldut cun l fonds soziel europeich. Dl 1990 devëntela diretëura dla Repartizion Furmazion prufescionela taliana. Dl 2003 giatela la ncëria de mené l Departimënt per l Lëur, la inuvazion y la nrescida, la cooperatives, la imigrazion, la valivanza dla chances y la furmazion prufescionela taliana mantenian la direzion dla repartizion nunzieda tlo dessëura.
Vizepresidënta dl Istitut pedagogich talian, cumëmber dl cumité scientifich dl Istitut de nrescida dla Camera de Cumerz, la reprejentea la Provinzia tl Cunsëi d'aministrazion dl TIS (Parch tecnologich) y tl Cunsëi d' aministrazion dla BLS (Business Location Südtirol).
La crëia te n model de na sozietà te chëla che svilup economich y la sustenibltà ambientela posse cunviver, ma ulache à lerch nce mprenditëures rëidli y respunsabli y n sistem de lëur y stieres segures y cualifichedes, na sozietà, te chëla che l ie lidëza y segurëza soziela, ulache la persones posse crëscer prufescionalmënter y se furmé , ulache l ie puscibl lië la cariera y l lëur cun la  familia, l merit y la valivanza dla chances.
Barbara Repetto à doi fredesc y na sor, doi mutons y na muta, sies nepoc. La à gën l mer y la montes y uni sort de sport, dantaldut ti sal bel a jì cun i schi (la ie stata tla naziunela B de slalom speziel). La ie dla minonga che l sibe plu mpurtant scuté su che rujené y che n dësse ti dé arta a uni persona, unfat da cie stat soziel che la vën, unfat tan vedla, de cie etnia o auter che la sibe.
L ti sta a cuer la natura, la cujina gën, à gën i tieres ne stlujan ora degun. La ie unida liteda cun 1.939 ujes. Dai 18 de nuvëmber ai 18 de dezëmber 2008 vizepresidënta dl Cunsëi provinziel.
Al'assessëura Repetto ti iel unit sëurandat la ncëria per la cumpetënzes Inuvazion, nrescida y svilup, Nfurmatica, Svilup dla Cooperazion, Lëur, Finanzes y Bilanz y Furmazion prufescionela taliana.