Egartner, Christian (SVP)

Nasciù ai 13 de mei dl 1964 a Sterzing. L sta a Gossensaß cun si fëna, Silvia Larch y si trëi mutons Raphael, Christopher y la muta Romy. Scolina y scola elementera a Gossensaß, scola mesana pra i patri capuzineri a Salern dlongia Vahrn. Lernerat da mecanicher pra la firma Wipptaler Bau AG y scola prufescionela (da mecanicher) a Persenon stluta ju cun l diplom da fant. Doi ani alalongia chelner y "pizzaiolo" a Verona dan unì de reviers dl 1986 tla firma Wipptaler Bau AG cun na ncëria diretiva. Da 22 ani respunsabl te si firma per l setor dla frabica de stredes y asfalt.
Atività te lies: 1998 - 2006 cumëmber dl diretif raionel dl'assoziazion di mprenditëures; dal 2005 nchin jené dl 2009 presidënt dl Cunsorz che resta tresora di costrutëures de Südtirol; dal 2006 al 2009 presidënt dl coleghium di costrutëures de Südtirol.
Atività de ulentariat: da 22 ani cumëmber di destudafuech de Gossensaß; da 13 ani cumëmber dl diretif dla lia amatoriela de sport de Gossensaß y dal 2007 si presidënt; da 28 ani cumëmber dl Alpenverein Südtirol, sezion de Gossensaß; da 6 ani  cumëmber dl diretif dla nteressënza per i bòsc de Pflersch y da 6 ani cumëmber atif tl raion de ciacia dl Prëner.
Atività politica: dal 1990 - 1993 referënt di jëuni a Gossensaß/Außerpflersch; dal 1990 cumëmber dl diretif dl partit dla SVP a livel de luech; dal 1993 al 2009 sëurastant a livel de luech dla SVP a Gossensass/Außerpflersch; dal 1995 al 2009 ambolt dl chemun de Prëner; dal 2005 nchin 2008 cumëmber dl Cunsëi y dl diretif dla Comunità dl raion dl Wipptal y dal 2006 sëurastant dla SVP dl raion Wipptal.
Pra la veles dl Cunsëi provinziel dl 2008 iel unì lità per l prim iede te Cunsëi cun 11.002 ujes de preferënza.