|
D'atres comisciuns
Dlungia les comisciuns legislatives esìstel na ligna de d'atres comisciuns permanëntes o istituides ad hoc:
La comisciun de convalidité
Le Consëi provinzial à le podëi de iudiché instës sce sü comëmbri lità ademplësc dötes les condiziuns por l'amisciun al ofize y por so eserzize. Por fà chësc se sorvësc le Consëi provinzial de n organn d'inrescida denominé comisciun de convalidité.
La comisciun de convalidité vëgn nominada dala presidënta o dal presidënt dl Consëi tl tëmp de chinesc dé dala pröma sentada dl Consëi, do avëi aldì i capi dles fraziuns. Ara é metüda adöm da set aconsiadësses/aconsiadus. La composiziun dla comisciun mëss corespogne ala consistënza di grups linguistics insciö sciöche ai é rapresentà tl Consëi provinzial y tan inant che ara va a chëra dles fraziuns. I comëmbri dla comisciun ne po no refusé süa nominaziun, no dè les dimisciuns y no se fà sostituì.
La comisciun de convalidité ejaminëia les detlaraziuns che vigni aconsiadëssa inpormò litada o aconsiadù impormò lité mëss dè jö por ci che reverda sides les funziuns y i ofizi eserzità pro ënc publics o privac y les inciaries surantutes, sciöche ince les ativitês y les funziuns imprenditoriales o profescionales eserzitades che po rapresentè na rajun de ilitabilité o incompatibilité, ara damana do documënc en relaziun ales verificaziuns y ales inrescides comanades, tol sö les informaziuns y ascuta, sce ara l'arata d'ütl y nezesciar, les aconsiadësses interessades y i aconsidus interessà. Döta l'ativité d'inrescida, por chëra che la comisciun po ince se sorvì dla colaboraziun de porsones espertes da defora, à le fin de constatè sce al esist o no ti confrunc dles aconsiadësses y di aconsiadus impormò lità, o de chi che vëgn do intratan la perioda de legislatöra, rajuns de ilitabilité o de incompatibilité.
Sot a ilitabilité ne capësciun nia la mancianza dl dërt de lîta passif mo l'esistënza de na rajun che impedësc d'eserzité chësc dërt cina che al romagn la gauja dl impedimënt. Ara se trata insciö de n impedimënt iuridich che influenzëia la poscibilité de candidatöra y la lîta suandënta de na porsona y à cun chësc sciöche conseguënza l'anulamënt dla lîta.
Cun incompatibilité intënun indere l'esistënza de na zircostanza che influenzëia la poscibilité d'eserzité concretamënter le mandat politich. La lege vëiga danfora che l'eserzize de certi ofizi o de certes inciaries, o l'esecuziun de certi mandac te ënc publics y privac sciöche ince l'eserzize de determinades ativitês y funziuns profescionales n'é nia compatibli cun l'inciaria de aconsiadëssa o aconsiadù dla Provinzia.
Sce la comisciun de convalidité à rajun de crëie che pro n'aconsiadëssa o n aconsiadù esìstel motifs de ilitabilité o de incompatibilité mëtera a jì na prozedöra d'inrescida y ti tira dant formalmënter al'aconsiadëssa o al aconsiadù i fac. L'aconsiadëssa o l'aconsiadù po sön na tara presentè por scrit tl tëmp de chinesc dé do avëi ciafè la comunicaziun sües obieziuns o, tl caje che al esist n motif de incompatibilité, ciarè da l'eliminé por tëmp. Do avëi ciafè les obieziuns o les detlaraziuns decuntra stabilësc la comisciun sce al é nezesciar n terminn por la tratativa invian adalerch l'aconsiadëssa interessada o l'aconsiadù interessè che po se damanè intratan la discusciun dl caje dan dala comisciun l'assistënza de na porsona de süa crëta.
Ala fin dl'ativité de inrescimënt, che mëss gnì stlüta jö tl tëmp de sis mëisc do la nominaziun, presënta la comisciun de convalidité na relaziun finala al Consëi provinzial y formulëia por vigni aconsiadëssa y aconsiadù na racomanaziun motivada de convalidité dla lîta o de constataziun formala de n motif de ilitabilité che porta de conseguënza al anulamënt dla lîta y ala tomanza dal'inciaria o, sciöche alternativa implü, de constataziun formala dla presënza de n motif de incompatibilité.
La dezijiun definitiva por ci che reverda la presënza de rajuns de ilitabilité o de incompatibilité ti speta al Consëi provinzial che ejaminëia la relaziun y les propostes de deliberaziun presentades dala comisciun de convalidité tla pröma seziun dl Consëi suzessiva ala presentaziun y tol les dezijiuns aladô.
La comisciun de convalidité por la legislatöra corënta é gnüda istituida cun decret dl presidënt dl Consëi n. 171 dl 3 de dezëmber dl 2003.
Te süa pröma sentada dl 10 de dezëmber 2003 à la comisciun lité le presidënt, le vizepresidënt y la secreteria.
Süa composiziun é porchël la suandënta:
Comisciun por le regolamënt intern
Ara vëgn nominada dala presidënta o dal presidënt dl Consëi provinzial do avëi aldì i capi dles fraziuns. La comisciun é metüda adöm dala presidënta o dal presidënt dl Consëi provinzial che la presidiëia y da cin aconsiadësses/aconsiadus; dui de chisc mëss fà pert dla mendranza politica. Ala comisciun por le regolamënt intern ti speta l'ejaminaziun preliminara de dötes les propostes de modificaziun dl regolamënt intern presentades dales aconsiadësses o dai aconsiadus. Les contlujiuns vëgn spo presentades al Consëi por l'aprovaziun definitiva.
Tla sentada do süa nominaziun ai 13 de jenà 2004 à la presidënta dl Consëi provinzial Stirner Brantsch comuniché i inoms dles aconsiadësses y di aconsiadus cherdà a fà pert dla comisciun por le regolamënt intern. Chësta comisciun che é presidiada de dërt dala presidënta dl Consëi provinzial é metüda adöm insciö:
Test dl regolamënt intern (aprovè cun deliberaziun dl Consëi provinzial dl 12 de mà 1993, n. 4, y modifiché y completè cun deliberaziun dl Consëi provinzial dl 11 de dezëmber 2001, n. 7 y cun deliberaziun dl Consëi provinzial dl 7 de mà 2003, n. 5)
Comisciuns speziales
Aladô dl articul 24 dl regolamënt intern po le Consëi provinzial nominé comisciuns speziales por l'ejaminaziun de determinades chestiuns o de propostes de lege che reverda seturs d'interès particolar por la Provinzia. La domanda de nominaziun de na te'comisciun po gnì presentada sides dales aconsiadësses o dai aconsiadus che dala Junta provinziala.
Tla sentada dl 4 de forà 2004 à le Consëi provinzial istituì tla legislatöra corënta, sciöche al ê bele ince te chëra da denant, na comisciun speziala che à la inciaria d'ejaminé i dessëgns de lege tles materies de competënza dla Provinzia aladô dl articul 47 dl D.P.R. dl 31 de agost 1972, n. 670, y mudaziuns y integraziuns suandëntes (Statut d'autonomia).
Ara se trata dles materies suandëntes:
- determinaziun dla forma de govern dla Provinzia y dantadöt dles modalitês de lîta dl Consëi provinzial, dla presidënta o dl presidënt dla Provinzia y dles assessuries y di assessurs;
-
raporc inanter i organns dla Provinzia;
-
presentaziun y aprovaziun de na moziun de desfidënza motivada ti confrunc dl presidënt/dla presidënta dla Provinzia;
-
caji de ilitabilité y de incompatibilité cun les inciaries aladô dl punt 1;
-
eserzize dl dërt de scomenciadia popolara por ci che reverda les leges provinziales y i referendums provinziai abrogatifs, introdutifs y consultifs.
La comisciun speziala, nominada cun decret dla presidënta dl Consëi provinzial di 12 de forà, n. 11, metüda adöm dai aconsiadus dr. Walter Baumgartner (SVP), Alessandro Urzì (Alleanza Nazionale), Ulli Mair (Die Freiheitlichen), Michaela Biancofiore (Forza Italia), dr. Luigi Cigolla (Il Centro - Margherita), Marialuisa Gnecchi (Gemeinsam Links - Frieden und Gerechtigkeit), dr.a Cristina Kury (Grupa vërda), Andreas Pöder (Union für Südtirol) y Donato Seppi (Unitalia - Movimento Iniziativa Sociale), à metü man de laurè ai 3 de merz 2004 y s´é dada jö cun l'ejam di dessëgns de lege n. 1/03, n. 11/04, n. 47/04 y n. 48/04 (dessëgns de lege sura le tema democrazia direta, scomenciadia popolara y referendums).
Tla sentëda dl 2 de merz 2005 à le Consëi provinzial, sön inciaria dl capogrup dla SVP dr. Walter Baumgartner, tut la dezijiun de revochè la comisciun speziala istituida tl mëteman dla legislatöra y de surandè atira a la 1. comisciun legislativa les competënzes atribuides a so tëmp a la comisciun speziala. A chësta manira, dal 2 de merz 2005 inant ne à chësta comisciun speziala plü degöna validité.
A pert l'istituziun y l'aboliziun suandënta de chësta comisciun speziala, é gnüda istituida por le pröm iade tla legislatöra corënta na comisciun speziala nöia che arà le compit de se dè jö cun dötes les domandes de mudaziun dl Statut de autonomia.
Dlungia l'istituziun de chësta comisciun speziala por l'ejaminaziun de dessëgns de lege che reverda les materies preodüdes dal art. 47 dl Statut d'autonomia (l'ativité de chësta comisciun speziala é anfat a chëra de na comisciun legislativa) él por le pröm iade gnü metü sö te chësta legislatöra na comisciun speziala cun la inciaria d'ejaminé les propostes eventuales de modificaziun dl Statut d'autonomia. Les propostes de modificaziun dl Statut d'autonomia po gnì fates sides dales singules aconsiadësses o dai singui aconsiadus o dala Junta provinziala presentan n test partì sö te articui cun na relaziun d'acompagnamënt, sciöche ince dal Guern Zentral o da parlamentars presentan n dessëgn de lege costituzionala ala Ciamena di Deputac o al Senat. Aladô di articui 108-bis y 108-ter dl regolamënt intern dl Consëi provinzial ti speta a na comisciun speziala la inciaria d'ejaminé les propostes de modificaziun dl Statut d'autonomia presentades dales aconsiadësses y dai aconsiadus o dala Junta provinziala aladô dla prozedöra odüda danfora por i dessëgns de lege o, tl caje de dessëgns de lege costituzionala presentà al Parlamënt y ortià al Consëi provinzial por l'espresciun de n arat, de reodëi chisc dessëgns de lege y propone al Consëi l'arat da dè jö.
La particolarité de chësta comisciun é che ara é metüda adöm dai capogrups de dötes les fraziuns dl Consëi o dales porsones da ai delegades y che pro dötes les litaziuns à vigni comëmber dla comisciun tan de usc sciöche le numer di comëmbri dla fraziun de chëra che al fej pert (dërt de lîta ecuivalënt).
Chësta comisciun speziala é gnüda nominada cun decret dla presidënta dl Consëi n. 6 dl 19 de jenà 2004 y ara é metüda adöm dai comëmbri suandënc:
Comisciuns d'inrescida
Sön domanda motivada de almanco n chert di comëmbri dl Consëi provinzial, che ó dì almanco 9 aconsiadësses/aconsiadus, nominëia la presidënta o le presidënt dl Consëi na comisciun d'inrescida; te chësta é vigni fraziun dl Consëi rapresentada da n comëmber che ara à nominé. Pro litaziuns eventuales tla comisciun à vigni comëmber tan de usc sciöche le numer di comëmbri dla fraziun de chëra che al fej pert. La comisciun se procurëia notizies, informaziuns y documënc por ci che reverda l'argomënt dl'inrescida y presentëia spo do avëi stlüt jö i laûrs al Consëi provinzial na relaziun sön i resultac y les contlujiuns. Ara po ince presentè propostes.
Te chësta legislatöra él gnü istituì indöt döes comisciuns d'inrescida.
Cun decret dla presidënta dl Consëi provinzial Stirner Brantsch n. 5/04 dl 13 de jenà 2004 él gnü istituì na comisciun d'inrescida sön domanda de 11 aconsiadësses/aconsiadus, che à ciafè la inciaria de verifiché l'adoranza de contribuc dla Provinzia ales aziëndes Milkon y Gastrofresh sciöche ince d'analisé na coresponsabilité eventuala da pert dla politica en relaziun ai dejordinns presentà al'opiniun publica.
La comiscun d'inrescida, de chëra che al à fat pert i aconsiadus/les aconsiadësses Pius Leitner (Die Freiheitlichen) sciöche presidënt, Donato Seppi (Unitalia - Movimento Initiativa Sociale) sciöche vizepresidënt, Sepp Kusstatscher y do la fin de süa inciaria l'aconsiadëssa Cristina Kury (Grupa vërda) sciöche secreter/ia, sciöche ince i comëmbri Walter Baumgartner (Südtiroler Volkspartei), Luigi Cigolla (Il Centro - Margherita), Marialuisa Gnecchi (Insieme a Sinistra - Pace e Diritti), Michaela Biancofiore (Forza Italia) y Andreas Pöder (Union für Südtirol), à stlüt jö sü laûrs ai 2 de forà 2005 cun l'aprovaziun dla relaziun finala proponüda dal aconsiadù Baumgartner.
Sura la relaziun finala y les döes relaziun ch'ê gnüdes proponüdes dal aconsiadù Leitner y dala aconsiadëssa Kury adöm cun l'aconsiadù Pöder, mo ch'ê spo gnüdes refodades dala comisciun y porchël ê indô gnüdes presentades sciöche relaziuns de mendranza, él gnü baié alalungia do süa letöra tla sentëda dl Consëi provinzial di 2 de merz, olache de plü aconsiadus y le rapresentant dla junta provinziala a tut la parora sura chësta chestiun.
Do la tuta de conoscënza dles relaziuns suradites y do la discusciun tl Consëi provinzial, é i laûrs dla comisciun d'inrescida sura la chestiun Milkon-Gastrofresh da conscidré sciöche formalmënter stlüc jö.
Ai 27 de jügn 2006 à 11 aconsiadësses/aconsiadus damanè l'istituziun de na comisciun d'inrescida ch'è spo gnüda istituida cun decret numer 149/06 dl 14.7.2006 dl presidënt dl Consëi provinzial Dello Sbarba. Cun le decret de istituziun ti él gnü surandè ala comisciun le compit de:
- verifiché sce al é veramënter debojën de dè fora dötes les inciaries y les consulënzes de d'atra natöra che la Provinzia o i ënc che depend da d'ëra dà fora ann por ann a esperc esterns o interns, ci che và a pesè dassënn söl bilanz provinzial;
- verifiché sce les normes preodüdes por le conferimënt dles inciaries suranominades é te chësc contest gnüdes respetades.
La comisciun - de chëra che al à fat pert i aconsiadus/les aconsiadësses Hermann Tahler (Südtiroler Volkspartei) sciöche presidënt, Donato Seppi (Unitalia Movimento Iniziativa Sociale) sciöche vizepresidënt, Alessandro Urzì (Alleanza Nazionale) sciöche secretêr y Luigi Cigolla (Il Centro), Marialiuisa Gnecchi (Insieme a Sinistra - Pace e Diritti), Hans Heiss (Grupa Verda), Eva Klotz (SÜD-TIROLER FREIHEIT - Freies Bündnis für Tirol - dal 1° de jügn 2007 do che ëra à lascè la fraziun "Union für Südtirol y metü sö na söa fraziun), Pius Leitner (Die Freiheitlichen), Alberto Pasquali (Forza Italia) y Andreas Pöder (Union für Südtirol) sciöche comëmbri - à stlüt jö sü laûrs ai 11 de messè 2007 cun l'aprovaziun dla relaziun finala proponüda dal presidënt dla comisciun Hermann Thaler. Sura chësta relaziun y la relaziun de mendranza presentada dal aconsiadù Andreas Pöder él gnü baié tla sentada dl Consëi provinzial ai 19 de setëmber 2007, olache de plü aconsiadus y i rapresentanc dla Junta provinziala à tut posiziun. Cun la tuta de conoscënza dles döes relaziuns suradites y do la discusciun tl Consëi provinzial é gnüda stlüta jö formalmënter la prozedöra d'inrescida metüda a jì cun l'istituziun dla comisciun d'inrescida.
Comisciun interregionala (Adunada legislativa dla Provinzia autonoma de Balsan, dla Provinzia autonoma de Trënt y dl Tirol cun Vorarlberg sciöche osservadù)
La comisciun interregionala à la inciaria d'arjigné les sentades coletives dl Consëi dla Provinzia autonoma de Balsan, dl Consëi dla Provinzia autonoma de Trënt y dl'adunada legislativa dl Tirol (le Vorarlberg tol pert ales sentades sciöche osservadù).
Tla secunda mesa pert dla legislatöra é la delegaziun dl Consëi dla Provinzia autonoma de Balsan te chësta comisciun metüda adöm insciö:
Comisciun paritetica aladô dl articul 84, coma 3, dl Statut d'autonomia
Sce pro na votaziun despartida aladô di grups linguistics sön na unité de basa dl bilanz ne ciafass la unité de basa nia la maioranza dles usc de vigni singul grup linguistich, mëss la unité de basa gnì presentada ala comisciun paritetica aladô dl articul 84, coma 3, dl Statut d'autonomia. Chësta comisciun determinëia la denominaziun definitiva dla unité de basa y stabilësc l'amunta definitiva dl stanziamënt relatif.
La comisciun é metüda adöm da dui aconsiadus dl grup linguistich talian y dui de chël todësch che vëgn nominà dales aconsiadësses y dai aconsiadus di respetifs grups linguistics y vëgn de conseguënza lità dal Consëi por döta la dorada dla legislatöra.
I comëmbri dla comisciun paritetica é gnüs lità tla sentada dl Consëi provinzial dl 4 de forà 2004 aladô dla proposta liënta dles aconsiadësses y di aconsiadus presentada dal grup linguistich talian y todësch.
Dla comisciun fej pert les aconsiadësses y i aconsiadus suandënc:
 |
Baumgartner dr. Walter (grup linguistich todësch) |
|
Frick dr. Werner (grup linguistich todësch) |
|
Urzí Alessandro (grup linguistich talian) |
|
(6) (grup linguistich talian) |
| |
|
| (6) |
neues Mitglied inant impede l'aconsiadëssa Gnecchi Luisa che ie unida liteda tl Parlamënt noch zu ernennen |
(Test: ressümé de desposiziuns fora dl regolamënt intern dl Consëi provinzial)
|
e-mail
Italiano
